Swigh Azizen
I Driss Amri Babayyi
Ikwenf ils anfuren ssulin ileffighen
Takatin ur nesinin s tirgin ay Imazighen
Ad swigh f unezgum sul ur ffighen
Tid f illa ighd inedfuren ur tent llighen
Igh nezzem taghuyyit lkemn iy idemmilen
Ighd neghwli ghw azizen nezzel f isulilen
Izenzaren n tafukt ad agh ikkesn ineckilen
Irwas is rad neg tideqqit n ibalilen
Albensir Sifaw Maâtub Azayku imariren
Taos Xayreddin Zalhud takat ad sifriren
Aneccad Cuhad Belaïd Akunad Janti ghiren
Isan gh ubaraz n uzawan ar ttiriren
Hawad amedyaz neswa yakkw tirgin nejjawen
Ad nessu s tayri d tiddet izuran n ulawen
Nut f uzerf Amazigh ad giddin udmawen
Nfeld gh idlisen tugga awengh usawen
Farid Mohamed Zalhoud
Aday Tafraout